اخر ما كتبت على مدونتى الثانية
حيل الدفاع النفسى 2 يمكنك قرائته من هنا..

2/18/2009

شاهد على القسم ...ماحدث مع نوراة نجم ومعنا فى قسم قصر النيل وصور حصرية


السعاتى ونوارة


مفيد يتحدث مع نوارة





نوارة فى القسم ,,




مهنى والسعاتى ونوارة




فى انتظار جودو ..المامور




لسة برضة



عشت طوال حياتى الفتره الفائتة معتقدا بشكل او باخر ان تبرج المراة من اسباب التحرش بها..الا ان اليوم اثبتت النظرية اننا شعب يتحرش بنفسة اساسا..
*****
البدايه ..مكالمة من احمد مهنى.. _اية يا ابنى انت فين
فى بيتنا لية
نوارة نجم ..فى مشكلة فى وسط البلد .
_طيب انا لابس ونازل
سلام
***************************
_الو ..ايوة يا نوارة فى اية ..بتشنج ..ايوة يا غزالى ..فى ظابط اتريق عليا عشان الحجاب.._نعم ..دة فين دة وهو اية علاقتة اصلا_فى الشارع الى جمب الهيلتون..
_طيب خليكى مكانك انا جاى

******************************
فى الطريق فكرت اكلم مين..كل الاخوة الاصدقاء ظباط الشرطة قالولى انى اروح اكلمة بالادب واخلية يعتذر..يعتذر وادب..مش عارف..
روحت مكلم .."اسر" خدت منها رقم المحامى بتاعها..المحامى بتاع نهى رشدى برضة....
_الو ايوة يا استاذنا ...مع حضرتك محمد الغزالى مدون وكاتب ووو كنت عايز راى حضرتك فى موضوع
_اتفضل.
_نوارة فى حد اتعرضلها عند المتحف و
_لا لو سمحت بالتفاصيل..
_دقيقة واخليها تكلمك..
نوارة خدت التليفون وكلمتة ونصحها بنفس النصيحة ..اننا نعمل محضرين الاول فى قسم شرطة قصر النيل والتانى فى الوزارة..
داخل القسم الامين الى برة بيسالنا رايحين فين..
فبقولة داخلين جوة يا ابنى
بيقولى حضرتك ظابط..قولتلة لا مواطن داخل اعمل بلاغ.. وقولت لمهنى بضحك ..البالطو عامل شغل..المهم روحنا قعدنا مستنين لحد منا الباشا خلص غداء وبعدين دخلنا ها يا باشا ..اتفضلو ..بداتنوارة تحكى بالتفصيل الحكاية الى هاتحكيها بعد كدة يجيى 30 مرة مثلا ..حصل اية

حصل انها وهى خارجة من منفذ جامعة الدول..المنفذ اسمة كدة..على ميدان التحرير كان على شمالها ظهر النيل هيلتون والمتحف..المطبات هناك عالية اوى....فبتكلم راجل فى الكشك قالتلة بالنص الى حفظتة ..
_المطبات هنا عالية اوى لية كدة..هاتبوظ العربية..
_علشان الارهابين الى يفجرو المتحف ميلحقوش يهربو...
_ارهابين اية بعد الشر ربنا يستر
_والله يا انسة مش بعيد هما كلهم بيبقو لابسين زيك كدة..
واشار بايدة على الحجاب
فردت..بذهول
_المرة الجاية متبقاش تعدينى..

_لا على اية انا حفظت رقم عربيتك وشكلها...
هنا بداء الانهيار...فطبعا الاخت اكمنها طيبة واصيلة..راحت رايحة للى بعدة تشتكى..

_على فكرة زميلك الى فى الكشك الى هناك قالى (الحوار السابق) وانا صحفية ومش هاسكت
_لا يا هانم هو ميقصدش..مش كل المحجبات ارهابيين برضة..!!

بس الضابط الى بيكتب المحضر حب يهدى الجو..فتكلمت انا

- بص حضرتك احنا صحفيين وقولنا قبل ما نطلع على الجرايد نكتب الكلام دة نيجى نشتكى الاول فى البلد مش فى قانون برضة..فبهت اخونا


قالها معاكى كارنية النقابة..قالتلة اه والبطاقة.. رد الاخ ..لا انا عايز كارنية النقابة..راحت مديالة كارنية الاتحاد بتاع الاذاعة والتليفزيون..


وراح خارج برة..واتاخر..فانا قولت اخرج اشوف الجو..لقيت الباشا واقف بيميلى البينات عبر الموبايل..ويا باشا كيت كيت كطيت..ومعاه موبايل تانى لسة هاشوف فى اية .طلعلى عسكرى ظريف


_خير يا باشا


_الحمام منين..


اخر الطرقة شمال


شكرا


اخرج لاجدة مستمر فى المكالمة ..ويطوى ورقة المحضر الذى كتبة..ويستدعى ظابط من قسم الجزيرة...فى الوقت دة مفيد جة وجة احمد الساعاتي


ولد صغير وتانى مرة اشوفة بس جدع..المهم الاخوة فى القسم اول ما مفيد دخل القسم قالولوة انت رايح فين..علشان دقنة ..وقالولة اقفل موبايلك..قام قالهم وانت جاى هنا لية اصلا...
قالهم انا داخل لزميل ليا بيعمل محضر...وطبعا مفيد جة فالحوار اتعاد من الاول...فالظابط كان عايز يتكلم ودى تانى..


قولتلة فى ناس زمايلنا فى جرايد جايين..دة يضايق حضرتك..قالى لا ويشربو الشاى كمان بس على حسابك..


شوية وجة الضابط الى من قسم الجزيرة..


وروحو معاة بقى..ركبنا مع نوارة العربية..والباشا جة ورانا فى البوكس..عارف لما تروح منطقة...تحس انها مستعدة لاستقبالك..


باب المنفذ الى علطول مقفول وفى ظابط واقف عندة بيبص على رخصك مفتوح ومفيش ولا ظابط موجود كل الموجودين عساكر


الظابط الى معانا نزل بص ..الكشك يا ولادة فاضى خالص..طيب تفتكر مين دة..

قالنا ..يمكن يطلع مسيحى فى الاخر

قولتلة مقلنا كدة...

رجع تانى قالك لا مفيش ظابط ممكن يقول كدة ..دة اكيد عسكرى الى بيبلسو كدة الكلابة ..وبتوع دوريات الشرطة الراكبة..والمرور ..مع ان بعد كدة اتقال مفيش حد بيليس كدة فى الشرطة اصلا...المهم روحنا قعدنا ندو ر..سالت امين شرطة انا ومفيد قالنا الدوريات الى هنا بتخلص 8..بس مفيش دوريات دلوقتىوجة الظابط وروحنا القسم تانى لقيت وجة يصعب ان ينساة اى حد ( الضابط سموأل ابو سحلة)..تنحت انا ومفيد ..مفيد بيقولى عارف مين دة..قولتلة وهل يخفى ابو سحلة..قعد يقنعنا بانة اكيد مختل او مش ظابط اصلا واكيد عسكرى ..او مش عسكرى كمان دة حد من حرس المتحف او من شركة امن..قولتلة ..بص حضرتك
_احنا عايزيزن نعمل محضر فى بلدنا وفى القسم التابع لية الواقعة هل دة ممكن..
_سكت وقالى.؟.ممكن تستنو برة كلكم..جت نوارة تقوم قالها خليكى هنا..وسالها مين ابو جاكت اسود دة قالتلة ابن خالتى قعد يقنعها تتنازل ..وانا خرجت قدت اتصل بيها على الموبايل علشان ما تتنازلش..فى الاخر دخلنا قعدنا تانى والمحضر اتكتب..وانا قاعد مع نوارة ..حاولت اصور الظابط قالى انا مرضيتش اخدة منك احتراما لمنصبك...
قولت اشطة كلهم فاكرنى ظابط او حد مهم او محامى علشان بتكلم بالقطارة ..وقف مفيد ومهنى والسعاتى مع اخويا ابو سحلة..وانا جوة مع نوارة بنكتب المحضر..وكل شوية نختلف ..ياعم اكتب لابس كذا..لا دة مش لبس ظباط..ومفيش ظابط هايعمل كدة..ماشى مش ظابط واحد
لابس كيت كيت وواقف فى المكان الفلانى والساعة الفلانية..انا عايز محضر..فدخل ابو سحلة هو والشباب قالى وبعدين طيب
بصيت فى عينية.
وقولتلة وبعدين هاجيبة..النهاردة..بكرة بعد بكرة بعد شهر بعد سنة..بعد 10 سنين اكيد هاينزل المتحف تانى..وساعتها هاجيبة واعرف اسمة وساعتها يبقى المحضر اثبات لحقى...
قالى يا ابو حميد..يعنى انا عارفك وعارف اسمك وهاجيبك...بلاش الكلام دة.
المحضر خلص..ممكن نمشى بقى..قالك لا المامور لازم يشوفكم ..طلعت برة لقيت المامور والنائب موجودين اصلا..قولت للسعاتى فى اية..
قالى كدة بتتلفق...
نوارة بدات تنهار بقى..عاليزة اروح..عايزة امشى ..قالها لا دة محضر كبير وبداء بتلذذ فى قراءة المحضر قطعة قطعة وسطر سطر
والبنت قدامة بتقولة عايز اروح ماما ظغطها عالى وعايزة اشوفها لو سمحت... ولا حياة لمن تنادى..فى الاخر بداء يزعق..مفيد قالة لو سمحت حضرتك متعليش صوتك..قالة يا استاذ انا بعمل شغلى..فمفيد رد بجراءة وانا لما بعمل شغلى مش بزعق لحد..راح الظابط قالة انت مش جة اختصام كلكم تخرجو برة...فانا قولتلة انا ابن خالتها ومش خارج..قالى انت ممكن تفضل جدعنة يعنى..قولتلة شكرا ..يدوم الذوق..شوية تانى ودخل الظابط وقالنا ممكن تخشو للمامور ودخل معنا ابو سحلة وهناك المامور قرى الكلام تانى..ووعدنا بالتصرف..المامور..(هانى جرجس )مامور قسم قصر النيل..وخد رقم تليفونى ..علشان انا ابن خالتها بقى ..
ولسة عايز يعدل فى المحضر ..قولتلة ممكن نمشى بعد كدة قالى اه...قولت لنوارة بتعرفى تجرى..قالتلى اه..قولتلها طيران على تحت..وركبنا العربية ونزلنا الشباب فى التحرير وانا روحتها البيت وبعد كدة روحت...تحيا مصر يا جدعان
دة رقم المحضر ...886 أداري قسم قصر النيل المحضر على ورقتين موقعة عليهم نوارة برقم بطاقتها...
ملحوظة
مع كل الاسهاب الى حكيت بيه دة انا كدة بحكى باختصار مخل تخيل انت بقى 5 سعات فى القسم بنتكلم ونتكلم ونتكلم
وفى الاخر محدش مروح غير لما المامور يشوفكم وفى الاخر المامور طلع فى القسم اصلا..وللحق احنا مضربناش ولا اتعذبنا ولا حد شتمنا باهلنا..ولا اى حاجة من دة حصل......


هناك 18 تعليقًا:

dr.Roufy يقول...

التحرش انواع ومدارس يا استاذي الفاضل
وعمر ما كان المظهر او الاحتشام فعلا مقياس لحدوثه
اكيد باحيي نوارة على اصرارها على اثبات اعتراضها على الى حصل
وباحييك بصفتك ابن خالتها
:))

ربنا معاكم ياشباب

.:.-=- ELGaZaLy-=-.:. يقول...

انا مش ابن خالتها يا دكتور..بس كان لازم اقول كدة علشان متبقاش لوحدها

الخوجة يقول...

يامحمد معلهش انا هعمل نسخة منه عندى علشان الكل يعرف انها مش لوحدها وانته مش لوحدك.ماشى قول ماشى ماهو انا اخدت نسخة خلاص

مهندس مصري يقول...

والله الشرطة بتاعتنا متخلفة و حتفضل علطول متخلفة
ربنا يجازيكم خير على وقفتكم معاها
الله ينور

الخوجة يقول...

محمد مدونتك حلوة بس غير التمبليت
ممتازة ومحتوى ممتاز لكن شكل التمبليت مش اوى

ماتزعلش ان اخذت نسخة بس طبعا اشرت ليك
انا كنت عاوز هدف وهات يامحمد بقية الصور مالكش دعوة امال بقية الاشخاص كنا عاوزين صور زيادة

قوس قزح يقول...

و الله ما عارفة ده يعتبر تحرش ولا لا
بس اللى اعرفه ان الظابط لما تحب تشكيه تشكيه فى الداخلية مش فى القسم

بأحيك انت و باقى المدونين على موقفكم و الواحد كده عرف ان وراه رجالة تاكل الزلط :)

و ربنا مع نوارة اكيد موقف صعب

عاشــــــ النقاب ـقــــة"نونو" يقول...

حلو اثبات الموقف لكن مع الاسف انسى
عمار يا مصر يا ارض اللوا

dr.Roufy يقول...

انا فاهمة طبعا
:))
انها مجرد دعابة يافندم
ولكن هذا لا يمنع اني برضه باحييك

dr.lecter يقول...

يعني ايه محجبه هتخبي قنبله جوه الحجاب يعني؟

ده علي اساس ايه اصلا وبعدين محمد مفيد دقنه عاديه مش دقن واحد ارهابي ولا متطرف ولا اي حاجه

هو خلاص بقت الدقن بعبع للداخليه وخلاص

والنبي يابني لو تعرفوا تجيبوا صور الظباط يبقي كتر خيركم

ميادة مدحت يقول...

شوف يا غزالى الحق على نوارة وهى اللى غلطانة أولا ازاى تلبس حجاب؟هى فاكرة ان فيه حرية شخصية فى مصر؟ وثانيا ازاى تمشى فى شارع فيه بوليس لا وكمان تعترض على المطبات اللى عاملاها الحكومة والله دى هزلت طب الحكومة عايزة تهشتك عربيات الشعب على الطريق الست نوارة ايه اللى يضايقها فى كده؟لا وكمان تكلم رجال الشرطة وتعترض يا سلام !!
المفروض ان اى مواطنة شريفة متلبسش الحجاب عشان محدش يتحرش بيها وكمان متتبرجش عشان برضه هايتحرشوا بيها هو المفروض أى مواطنة تقعد فى بيتها كافية خيرها شرها بلا تعليم بلا شغل بلا نيلةوحتى لو الشعب كله ستات ورجالة قعدوا فى البيت برضه مضمنش انه البوليس مش هايتحرش بيهم فى بيوتهم احسن حاجة المصريين يعملوا هجرة جماعيةواهو يبقى الهروب الكبير..

همسات دافئه يقول...

أنا مندهشه!!!
لاء بجد مستغربة!!!
هو فعلا كل الفلم الى انتوا عملتوه ده عشان الحوار ده
*****
علشان الارهابين الى يفجرو المتحف ميلحقوش يهربو...
_ارهابين اية بعد الشر ربنا يستر
_والله يا انسة مش بعيد هما كلهم بيبقو لابسين زيك كدة..
واشار بايدة على الحجاب
فردت..بذهول
_المرة الجاية متبقاش تعدينى..
*****
طب بلاش يعني هى فعلا ردت بذهول؟؟
معقوله كل الأدب ده وتذهل!!!(انا مش بتريق والله)
وبعدين تحرش ايه انت كبرت الكلمة اوي انا قلت أكيد شد الحجاب من عليها ولا حاجه عشان تروح القسم وتعمل كل ده
انا اول مره اعرف فى حياتي ان ده قضية
وليها عقوبه وكده!!
انا بجد مستغربه الى انتو عملتوه جدا
ده ممكن تكون هزار مداعبة بالنسبة للى بيحصل كل ساعة
!!!!!!!!!!!!!!!!!

نيران يقول...

دا على كدا انا كان المفروض ارفع مليون قضية على تلات ارباع اللي قابلوني من الشرطة في حياتي

يمكن احنا شعب ما عندناش ثقافة الاعتراض
و يمكن ما عندناش ثقافة دخول اقسام الشرطةخاصة للبنات..
بس صدقني انا بالنسبة للي بيحصل في البلد.. كان ممكن اعدي الموضوع.
يعني مش لازم نوارة كان يجيلها صدمة عصبية..
يمكن دا خلل في ثقافتي..
بس دا مجرد رأي.. ولا هو هنا مافيش حرية تعبير عن الرأي!!

كيكى يقول...

ازيك ياغزالى؟؟
انا لمة قريت البوست ولا استغربت ولا اندهشت ولا جالى أذبهلال ابداااااا
لانى بقرا حاجات زى كدة كتير بس بيقى فيها تفاصيل مش كويسة خالص يعنى
وعموما ابتسم انت فى مصر!!
عووووووووو

rovy يقول...

ازيك يا غزالى
المهم اننا نطمن على نواره ..
وعليك وكل الشباب الجدعان اللى كانوا معاك و اللى بيحسسونا ان لسه فيه امل فى وجود شباب رجاله بجد ..

ربنا يكرمكم و يحفظكم

تحياتى

Gannah يقول...

نوارة بيعجبنى فيها شجاعتها ومواجهتها للغلط
بصراحة بنت جدعة جدااا
بس انت كمان طلعت جدع جدااا
والظاهر ان البالطو عمل شغل كويس
الواحد كده اطمن اى مشكلة هيندهلك علطول
بصراحة انا عمرى ما افكر ادخل قسم لان اللى بيحصل ده مهزلة مش مستعدة اواجهها
مش بقلك انها شجاعة جداا
الشرطة عندنا عملينها لتعذيب وبهدلة الشعب
بجد انا لما بسمع الحاجاتت دى بتنكد جداا
ابقى قلنا على اللى هيحصل بعد كده
تحياتى

leeproo يقول...

كده يبقى انتا اكيد فى مصر
للأسف الشديد
ورغم ذلك برضو بحبها
على رأى حليم فى معبودة الجماهير

نبض اسكندرية يقول...

وانا مندمجة فى قراية الاحداث مش عارفة لية لقتنى بردد

صدى الهمس في الزحمة و الشوشرة
أسى الوحدة في اللمة و النتورة
هنا الحب و الكدب و المنظرة
نشا الغش في الوش و الإفترا
هنا القرش و الرش و القش و السمسرة
هنا الحب و الحق و الرحمة و المغفرة
هنا القاهرة القاهرة القاهرة

مش هتنظف غير بينا يا سيدى

mohra يقول...

من الجميل انكم لم تتنازلوا عن حقكم