اخر ما كتبت على مدونتى الثانية
حيل الدفاع النفسى 2 يمكنك قرائته من هنا..

2/14/2009

اعترفات مكتئب

فى احدى نوبات اكتئاب كثيرة تهاجمنى تلك الايام بقسوة لا استغربها ..اقرر الفرار من منزلى ومن رنين هاتفى وشاشة جهازى..اقرر ان اترك كل شئ ,محفظتى فى جيب بنطالى الايمن ..مفاتيحى فى جيب السويت شيرت الشال على كتفى ..ادير عربتى ومع مفتاح الكونتكت احاول جاهدا ان ادير مؤشر حياتى نحو السعادة فافشل..

****

_الو_ازيك يا نهى ؟

_الحمد لله ..انت كويس؟

_ومين كويس!!!انتى عاملة اية؟

تتكلم تصمت تضحك بطيبة وتخبرنى انها قررت ان تسامحنى لان الايام علمتها ان تسامح البشر لكى يسامحها الله عن ذنوبها الكثيرة..ابتسم واتذكر ان كل ذنوبها بالنسبة للكثيرين هى كتناول وجبة الافطار..اهممم وابتسم

****

افكر فى المكان الذى ساذهب الية لا جواب تفجائنى السيارة بالاتجاة بدون ارادة الى ذلك المقهى القديم ..اركنها واترجل ..

*****

_انت شيشت قبل كدة ..

_لا لية

_انفخ الدخان بيريح صدقنى.. هاتشرب معايا؟؟

_مش عارف

_تفاحتين يا حسن

****

اجلس فى الركن البعيد اطلب من حسن تفاحتى المعتادة وكوب القهوة ..ابتسم وبداخلى بركان الاكتئاب يتصاعد وموسيقى الحدث يتكفل عقلى بها..افكر فى كل شئ احاول ان احلل الاحداث بمنطقية ماذا يشعرنى بذلك..لماذا لماذا..يسقط بجانبى شاب ويتشنج لافيق من بحر الذكريات المتلاطم

****

_هو انت حفيد الامام الغزالى..

_هاتفرق؟

_اة طبعا انت لو حفيدة يبقى انت شايل حمل كبير اوى

_ولو مش حفيدة لو قريبة من بعيد

_حتى لو ابن خالة جدك

_بس انا مقربلهوش دة مجرد تشابة اسماء

_ انا سمعت انة قريبك

_لا تشابة اسماء بس

_شغال

*****

انتفض مبتعدا عن الشاب للحظة ثم اقترب هى حالة صرع

يا كل كتب الطب اسعفينى

فرويد ايها اللعين يا كل قرائتى عن مرض الصرع

يا خبراتى اللعينة ..يا جذوة العقل التى يشيد بها الجميع يارب

يا رحمة الله المقدسة انجدينى

اهتف فجائة

_طلعو لسانة برة متخليهوش يعضة ..لازم ينام على جمبة افرد رجلية ايدية مينفعش تتساب كدة..اتحول من "محمد" المكتئب الى الحكيم فى لحظات تكتسب نبرات صوتى اللجهه الامرة ,,سيبة يتنفس ...التقط اسمة "وليد"...يارب "وليد"

****

_انت بتدرس علم نفس ولا خلصت

_لا لسة بدرس

_كل دة...وقبل كدة كنت فين .

_هندسة

_وسبتها لية

_ملقتش نفسى بس

_سقطت يعنى

_تفرق سقط ولا اترفدت ولا سبتها ؟

_اه تفرق..وبعدين انا عايز افهم

_ملقتش نفسى بس_اترفدت يعنى ..او سقطت وبعدين اترفدتفابتسم ..

_بالظبط كدة

****

ارى بوادر الانفراج ..بحركة من قدمية ..

_وليد فوق انت كويس ..""وليد" ارفع حاجبة فينظر الى بخواء

_وليد..يتكلم الواقف بجوارى ..

_وليد اكلم المدام يتصل ويخبرها بالحالة ...احملة ليجلس ..اكاد ان ابكى لعجزى..يا رب ..اتقمص مرة اخرى لا اعرف كيف عرفت انة يجب ان يفيق..

_بصلى يا وليد وليد

_يتمتم باسم لا اتبينة

هل قصرت حينما لم اقراء اكثر ..لم اتذكر منذ البداية الان فقط اتذكر كيف يجب ان تنتهى النوبة..يا كل اشارات الكون المقدسة انا ابن ادم انا الخليفة المنتظر اسعفينى..انا الضعيف بدونك..يارب لا تتركنى .

.يفيق ..انظر الى عينية ..

._حمدالله على السلامة

يارب هل تعلمنى الان ..هل تشير الى بشئ هل انا غبى لتلك الدرجة..

_قوم اقف فوق يا وليد

اسندة على كتفى فيستقيم تاتى امراتة ...احملة الى العربة ..ينظر الى بنظرة خاوية وتنظر الى امراته بنظرة تملؤها الامتنان اعود الى مقعدى..وشئ فى روحى قد تغير ..

_شكرا ..تهتف بها

_الشكر لله

اجلس وانا اشعر باننى اسمو انظر الى كل احزانى لأتعلم ..الان اتعلم كطفل يحبو بين يديى امة ..ياتينى الهدى الالهى فى صورة من صور اعجازة بالضعف البشرى ليعلمنى بان كل نجاحتى وانكسارتى وطموحاتى هي الزبد الذى سيذهب جفاء ..وبان كل ما نفعلة من خير او تسامح او مساعدة هي ما يمكث فى الارض شكرا يا "وليد" الذى لم اعرفة ..الحمد لله

هناك 8 تعليقات:

قوس قزح يقول...

و الله يا محمد ده بيكون احساسى بعد زيارة المستشفيات .. بحس اد ايه احنا متدلعين و شاغلين بالنا بذكريات و مشاكل حلها بسيط
و بقول اومال لو الواحد عنده مرض مالوش علاج ولا بيشوف حد من اولاده قدامه بيموت ببطىء

وقتها بشوف الدنيا صغيرة اوى و احنا اللى مكبرنها و هى مش تستاهل

الحمدلله ان ربنا بيخلينا نشوف و نتعمل من غير ما تكون المصيبة فينا او فى احبابنا
الحمدلله الذى عفانا مما ابتلى به الاخرين

مـحـمـد مـفـيـد يقول...

الرائعه داليا سبقتني
:)
الله عليك يا محمد
تعرف يا محمد هي دي الازمه فعلا
اننا مش بنعرف قيمه النعمه اللي احنا فيها الا لما بنفقدها
لذلك تجدنا مترنحين في غيابات هذه الحياه حتي تقع الصدمه

عجبني اوي اوي تناولك للموضوع

shaimaa samir يقول...

هل قصرت حينما لم اقراء اكثر ..لم اتذكر منذ البداية الان فقط اتذكر كيف يجب ان تنتهى النوبة..يا كل اشارات الكون المقدسة انا ابن ادم انا الخليفة المنتظر اسعفينى..انا الضعيف بدونك..يارب لا تتركنى

والمقطع الاخير راااااائع

مبروك المجموعة
والجمهورية
وكل شىء

Jana يقول...

تلك البشر التى تأتى فى لحظة وتختفى فى أخرى ...تاركة ورائها أثرا فى النفس ...أستشعر احيانا انها ليست بشر كما تخيلنا وانما هى ملائكة بعثها الله لنا لتقوم بمهمة محددة وتترك فى قلبك هذا الصدى الذى يعينك على مواصلة طريقك الصحيح فلا تجذبك الدنيا الى آخر او تحيدك نفسك عن الطريق
وتلك الرحمة أعتقد ايضا ان الله يخص بها بعض العباد من فى قلوبهم خيرا كبيرا
فمن كان ولاءه لله فلن يضيعه
..........
أخشى دائما السعادة العارمة التى تنتابنا احيانا بعد تحقيق نجاح او استقبال فرحة كنا ننتظرها ..فبعد أن تختفى أثاره ويضيع بخاره فى الهواء ...نقف لنتسائل
وماذا بعد!!!!!؟؟؟

فلا تترك نفسك لهذا الاحساس ..واعلم ان كل خطوة تخطوها فى الطريق الصحيح تشكل فى نفسك شيئا جديدا ...تقربك من الله
فاحتسب النية وتوكل عليه

خالص تحياتى يا محمد

mohra يقول...

يقول البعض ان السعاده هى ان تسعد من حولك ...ان تكون سببا فى رسم بسمه على شفاههم

shayma يقول...

انك تحس انك عايش مش موجود وخلاص


بجد راائعه كعادتك يا محمد

سلامى
:))

ذو النون المصري يقول...

كعهدنا بك دائما
سرد سريع وة خفيف لكنه عميق في النفس الوقت
و الحكاية تخرج من عندك كانها واقعيه او هي الي الواقع اقرب
دمت بخير
تحياتي

ذو النون المصري يقول...

ادير كونتاكت السياره
و ادير مؤشر حياتي
مقابله تعودت عليها وانتظرها دائما في اي شيء اقراه لك
لانها تخرج منك و تثير امتاعنا لانها تاتي رقيقه جدا