اخر ما كتبت على مدونتى الثانية
حيل الدفاع النفسى 2 يمكنك قرائته من هنا..

9/11/2008

أم عبده فين

أم عبده فين

عندما صدح بليل الفن الشعبي الأخ عدويه باغنيتة الشهرية أم عبده فين هي راحت فين ..لم يكن يتوقع طبعا أو يتخيل إن يسعده حظه بان ياتى اليوم الذي يصبح فيه يغنى عن إحدى الأساطير الثلاث..العنقاء وأم عبده..وان يترك مهند نور.
----------------------------

إن كنت قد رأيت المسلسل الأشهر نور فحظك عظيم وأنت كنت قد صادفته وأنت تتمشى فى بيتكم العامر ..وأختك وأمك جالسين منبهرين بمهند الشهم الذي يذكرني بالأخ ادهم صبري قدس الله ثراه ..لا تعلم من هو مهند ..آه تعلمه بالتأكيد كنت سوف أقيم الأرض ولن أقعدها إن كنت لا تعلم مهند الوسيم الأشقر الذي يكفى حضوره الثلجي على الشاشة لتتنهد قلوب العذارى وتسقط القلوب متشحتفة آه والنبي...وبما أنى قليل الأدب ومش متربي ..فكان يكفى إن احدث صوتا حينما كنت اجلس عند صديقي اتسائل عن إمكانية شرب كوب شاي ...لتنهرني امة بنظرة تكاد تقتلني..وبما إن صديقي هو كمان متشتحتف., فقد جلست غاصبا مغصوبا وعهد الله.لأرى مسلسل ركيك مدبلج لمسلسل تركى اقل ما يقال عنة انة بلا اى قصة ولا اى شئ سوى بعض الرجال الوسيمين للغاية والنساء التى لن تجدهم الا فى فاترينات العرض فقط..والمسلسل لمن لم يراه يمر بحياة الأخ المز مهند- والتعبير لأخت مثقفة..نقلته منها كما قالته- يحب فية البت نور إلى متستاهلش ضفره..وفى بقى أشرار وكده..و المهم فى الحلقة الى شوفتها الاشرار دول هاجمو أسماله علية صاينة وحارسة سى مهند وبما انة قوي بقى وجامد طحن بقى..راح شياطهم وقالهم امشو يا وحشين من هنا إنا مهند الأمور إلى مدوب البنات..فتقريبا طعنوه على ايدى يجيى 500 طعنة..ورموه فى الارض .شوف بقى حكمة ربنا يا مؤمن..مش يتكل على الله ويخلصنا منة..لا فى ناس معرفش هما مين لقوة و كلمو الحاجة نور وهى طالعة على المسرح..ومعرفش ليه لما كلموها وقالوها طلعت على المسرح برضه يمكن علشان يغمى عليها قدام الجمهور صدمة بقى.. وتروح المستشفى فالدكتور يقولها انة عايز كلية..ووتتبرلعة وكده المهم علشان المرارة
بما إن نهاية المسلسل حظي التعيس لم يسعدني فأشاهدها ..لانشغالي ببعض أمور العمل التافهة بس إن شاء الرحمن سوف أعوض ذالك النقص الذي يؤنبني و يشعرني بكم إنا مقصر في حق مهند بان اشترى الحلقات كلها وأعاقب نفسي بنفس بيدي لا بيد عمرو
المهم ما فهمته من حلقة ونصف لانى لم اتحمل اكثر من ذالك هو ان نور بتحب مهند والجور بسم الله حمار وحلاوة يا بطيخ...وأتراك بقى وما إدراك ...دعك طبعا من الحقد الطبقي بما إن العبد لله اسمر أساسا.. ففكرت قليلا وانأ اشرب كوب الشاي بلبن الصباحي ..وأتشوق لقطعة بتاو وقطعة مش جبنه قديمة..ما هو سر تعلقنا الأهبل بمسلسلات الغرب التى غالبا ما تفشل فى الغرب لتنجح هنا..ليس عيبا فى المسلسل التركى بالطبع ولا فى كل ما يلية من مسلسلات ان تلاقى روجا عندنا العيب فينا اذكر من هنا على سبيل المثال لا الحصر المسلسل الرائع الجرئ والجميلات جدا..بتاع ريك ومش فاكر مين..تقريبا شغال لحد دلوقتى..المسلسل دة محققش نجاح فى أمريكا أصلا...بس نجح عندنا نجاح ابن لذينا...كان يجيى 9 باين على القناة الثانية ..وأول ما يجيى..تلاقى الناس هوب وصمت..تقولش قران يا جدعان..ومرورا بعد ذالك بمسلسل هركليز ألذيذ إلى كان يضرب كل الأشرار هو والوأد صاحبة إلى مش فاكر أسمة دة..وجاء بعد منة تقريبا مسلسل زينا بنت الذينا ..إلى كانت مموتة تقريبا نص الأشرار إلى فى اليونان ..بالطبع كنت اعرف كثيرا من الأوغاد كانو يحضرون ذالك المسلسل لان الأخت زينا كانت مبتحرمش المشاهدين من حاجة يعنى ..المهم فكرت وانأ اتامل بكوب الشاي بلبن إياه..ما سر نجاح كل تلك المسلسلات عندنا..لم تستغرق منى الإجابة سوى بضع دقائق لاختفاء أم عبده ..بالفعل..فكر هكذا الانفصال الذي حدث بين الطبقة المتوسطة والطبقة الدنيا..جعلنا جميعا..نحاول إن نتنكر من أصولنا..كلنا الحمد لله بنقول كول..يس ..واو ..براود ..اوة ماى جد..
نو كومنت...مفيش حد فينا يا جدعان تعليم مجاني..محدش قعد على تختة..
المهم نرجع لموضوع ظاهرة اختفاء أم عبده ..أو التنكر لأصولنا ..بداء الأمر مع برنامج صباح الخير يا خالتي مصر..والتريقة على الطبقة الكادحة التى لم تنال التعليم الكافي.. ومروروا بشعبولة والتريقة علية وعلى الفاظة ونطقة ..بداء الجميع يصبحون فى يوم وليلة من المهندسين ومصر الجديدة ..ويتكلمون اربع لغات بالطبع..وبدا الجميع يتكلم بالشوكة والسكينة..فأصبح الجميع مقلد ..والمشكلة انة مقلد سئ ..يعنى ببساطة تحول عبد الحليم إلى تأمر حسنى المسهوك الأعظم ..وتحولت مصر هبة النيل..إلى مشربتش من نيلها ..فكان لابد من إن تختفي أم عبده..أم عبده هنا تعنى القيم الداخلية لمجتمعنا ..عندها فقط لم يصبح فتى أحلام اى فتاة شاب متدين أو شاب حتى محترم بل واد كول ومخلص..ومقطع السمكة وذيلها ويا سلام لو شبة تأمر وبشعر فى صدره ..حينها لم يصبح احد فينا يتكلم الا وكلماتة مقاطع من اللغة الانجليزية..وحتى اللغة العربية تنكرنا منها للغة الفرانكو ارب..مزيج من الأحرف الانجليزية التى تقوم بمقام الكلمات العربية..وأصبحت جلستنا فى كوستا..والغداء من كنتاكى..والعشاء ماك دليفرى دايما وايك...واى جاهل يقع مصيره فى عدم فهم تلك الأشياء يشرد تشريد اليهود من مصر..لذالك وانأ أرى المشتحتف تأمر حسنى وهو يتحدث عن إنتاج الجزء الثاني من سلمى ومش فاكر كان أسمة اية الفيلم ورئيت ان تامر يصلح لان يكون قدوة لكل شباب مصر بقميصة المفتوح ليعلمنا ان ربنا إدالة شعر فى صدره ..وأرجو إن يقوم احد بافهامة بان تلك ظاهرة طبيعية عند كل الذكور..و أرى بعدها..مهند وهو يخرج من المستشفى ..ويسال وين مرتي بأداء بارد وابعد ما يكون ليس عن واقع مجتمعنا بل عن واقع حتى المكسيك الشقيق ..فتبكى أخت صديقي..لم أتمالك نفسي..إلا إن اصرخ من كل قلبي أم عبده فين ..هي راحت فين
----------------------------------------------
على الهامش كل الشكر لشيخ الازهر العزيز الذى تصدى للاخ مهند وهاجمه..ونسى ان يهاجم من على نفس المنبر من تسبب فى كارثة الدويقة..شيخنا العزيز عندما تقف بين يدي الله سوف يفيدك ان شاء الله ان تنتقد مهند ولكن الا ترى معى ان كلمة حق فى وجة نظام فاسد افضل من نور ومهند..وحتى بقلظ بتاع ماما نجوى العزيز

هناك 67 تعليقًا:

بنت القمر يقول...

ام عبده بالف خير بس
مقدرتش تكمل بقا
لا ليها في الغدا كنتاكي ولا القعده في كوستا
بالنسبه لمهند ولا تشتري ولا تبيع اسأل اي مراهقة مصريه من 12 الي 18 سنه ها تسمع لك النهايه بتاعه المسلسل
وفي احتمال تلاقي امها كمان شافته ومتبعاه والاب شافوه غصب برضه انصياعالرغبه الاسره
تامر... عظيم تامر ده والكنافه الشعر اللي في صدره في العالم الحديث مبقتش موضه الاهبل ابن الهبل كل الممثلين الاجانب في الافلام محدش بيسيب الارف ده ولا الموديل بتوع البدل الرجالي
محدش بيسيب الكنافه السودا دي كده دة نظام احمد رمزي علي قديمه يعني:((
تحياتي

weswes يقول...

مين ام عبده دى انا موعاش عليها
انما مهند كان عامل ازمه بين البنات فى المدرسه اللى بشتغل فيها وسبب انى اتعرفت عليه
هو خناقه بين بنتين فى سنه سادسه ابتدائى على ان لون عينه رمادى مش زارقه
فقولت اشوف ايه الحككايه
بس كان عندى طاقه اكتر منك تبعت بتاع خمس حلقات وجبت اخرى
وبقيت اكتفى بالملخص اللى بيوصلنى من البنات فى المدرسه
لكن لمااخدت الاجاذه فجائة بام تلميذه متصله تشتكيلى ان ابو بنتها مانع مهند من دخول البيت-اقصد يتفرجوا علي يعنى- وان البنت وامه شايفين دن دى قلة دمقراطيه
الصراحه كان نفسى اقلها دى قلة ادب بس اكتفيت بان اقول لها ان هناك اهم من ذلك
ولعلنى لم اقنعها ولكنى حاولت
المشكله بقى يا حج محمد
ان المسلسلات دى قائمه على وجوه جميله وفيض من المشاعر عمال على بطال
وده ما ينقص الشعب المصرى
اولا الوجوه الجميله
ثانيا العواطف والمشاعر لان الشعب من كترالطحن اللى هو فيه لا يستطيع ان يمارس مشاعره فيكتفى بمشاهدتها فقط
وان يعيش الوهم ايضا معها
ولهذا تنجح مثل هذه المسلسلات

تحياتى و عفوا على الاطاله

mohra يقول...

اضحكتنى و قلت الكلام من على لسانى
و الله مانا فاهمه البلاوى اللى بتتحدف علينا دى اخرتها ايه
انا كنت فاكره انى الوحيده اللى مابتتفرجش عليه...كويس بقينا زملا

لم اعرف عن عيد ميلادك الا الان
كل سنه و انت طيب بس متأخره شويه و على رمضان كمان
مسنى كثيرا كلامك عن نقد الناس لبعضهم و كيف ان القوى هو من يصمت...ابكيتنى حقا


تحياتى

كلاكيت تانى وتانى يقول...

ذهلت حين وجدت والدتى وابنتى واختى يشاهدون مهند بهذة الصورة وانا لا اشاهدها 3 اجيال تجلس فى صمت برغم سوء المسلسل وتفاهتة الشديدة جدا وسطحية المضمون وايام تلو الاخرى واجد صورة تظهر مع نور على حوائط غرف ابنتى واختى التى تسكن المدينة المنورة ويكلمنى زوجها مستجديا أياي كى افيقها من غفلتها لترد علية فى الهاتف اثناء المسلسل
واجد نفسى وحيدة يوميا و2 تلفزيون فى المنزل يعرضون مهند حتى اضطررت الى شراء شاشة كمبيوتر وجهاز وصلة دش حتى اشاهد العاشرة مساءا بعيدا عن حمى مهند
أثرت اشجانى يا عزيزى
فلا تتصور مدى فرحتى بنهايتة فقد أوشكت بالفعل على الهجرة خارج منزلى بسببة
تحياتى

Moon-baby يقول...

اعتقد ان مسلسل نور-رغم سطحية حبكته و الاطالة الشديدة-قد القى الضوء على بعض الامراض الاجتماعية التي يعاني منها الشعب...قرأت باحد الصحف تقريرا عن هذا المسلسل و تقول فيه النساء المصريات انهن يفتقدن الرومانسية و التعبير عن الحب الذي دائما يظهره مهند لنور...احد النساء قالت انها لا تنتظر الا وردة من زوجها و كلمة طيبة كتعبير هن الحب...و انا اعتقد كل الاعتقاد ان في مثل هذا الزمن و تلك الظروف التي تمر بها مصر ، اصبح الانسان ترسا في ماكينة يصعب ان يتلامس من احاسيسه و ما بالك بالتعبير عنها...و انا شخصيا اشكر مسلسل نور لانه اوضح ذلك..و ان على الرجال (و النساء ايضا) ان يروا نقاط الضعف في علاقتهم مع شريك الحياة بدلا من ان يمنعوهن عن المشاهدة او يمتعضوا عند مشاهدتهم لذلك الفتى الوسيم

اما عن المراهقات..فذلك شيء طبيعي..شاب وسيم ..رومانسي ..رقيق..اكيد هيحبوه يعني :))


انا شخصيا كنت اشاهد المسلسل كي اتحسر على مصر...

و ملحوظة: الممثلات التركيات لسن فائقات الجمال كما قلت..بل ان اكثرهن "عاديين"..هي بس الشياكة و الذوق

اتفق معك ان المعالم المصرية في طريقها الي ان تطمس...و لكن هذا هو حال البلاد بعد العولمة...فماذا نفعل نحن بجانب التحسر و البكاء على الماضي؟

على الهامش: لا اعرف لماذا بعضهم شغوف بعبد الحليم؟ اسمع بعض اغانيه و اضحك...لا اراها تتناسب مع عقلية و واقع شباب هذا العصر...و لا اعني ان البديل يكون تامر..و لكن ممكن منير حلو :))

اسفة على الاطالة

ِِAdem El-Mahdy يقول...

مشكلة مهند هى مشكلة ثقافة شغب

ربنا يخرب بيتها الاعلام بتاعنا

همسات دافئه يقول...

السلام عليكم
ازيك يامحمد
دعنى اتفق وأختلف
بالنسبه لإعتراضك على المسلسل انا شايفه انك معترض على الفكره نفسها لإن المسلسل مكانش فيه اى حاجه خارجه ولا اى حاجه تئذى ثقافتنا ودينا
أما عن الفكره نفسها فده ضرورى جدا المسلسلات الأجنبيه بتخرجك من الإنعزال وبتخليك تشوف عالم جديد متصور فى اماكن جديده مع مهاره مختلفه فى التصوير والتمثيل والإخراج وبتعرفك ثقافه تانيه
انا يمكن مكنتش من المتابعين ليه اوى بس مفهوش حاجه تستحق انى اذم فيه
ثانيا بقيت كلامك صح ومظبوط وخصوصا الى ذى تامر ده الى بتتجمع حواليه الناس وتنجحه وهو افلامهم واطيه وأخلاقه معدومه اصلاً
وبالنسبه للعربى والكلمات الى هاجمت اللغه بتاعتنا فانا شايفه ان دا وضع طبيعى وفى اى لغه واى دوله عشان العولمه ذى ما قلت وأكيد مش لسه هنقول شاطر ومشطور:)) بس معاك ان فى ناس بتزرودها اوى
تحياتى ودعنا نتفق على ان نختلف
شيماء:)

زهرة الجنة (زهرة سابقا) يقول...

السلام عليكم
أذيك غزالي
أن شاء الله بخير

بالنسبة للمسلسل معرفوش ولا شوفت أصلا
لكن فجأه لاقيت كل اللي حواليا بتكلموا عن الزوجة اللي تم طلقها بسبب مهند
وبالرغم من أني مشوفتهش المسلسل ولا أعرف هذا المهند الا أن تصرفات اللي حواليا أكدت لي أنه مسلسل تافه وغبي

وفي كمان مسلسل سنوات الضياع بالنفس الغباء والتخلف

سبحان الله أحنا خلاص فقدنا مشاعرنا عشان ندور عليها داخل المسلسلات
فكل زوجة أصبحت تبحث داخل زوجها عن ذلك المهند
وكل فتاه أصبح فارس أحلامها أما أن يكون شبه مهند والا فلا ..ولا حول ولا قوة الا بالله

كل اللي بيحصلنا سببه البعد عن ربنا وقلة إيمانا
نسأل الله العفو والعافية
تحياتي لشخصك

سومه...مجنونه فى بلد عاقل يقول...

وأعاقب نفسي بنفس بيدي لا بيد عمرو
سيبك بقى من مهند ونور خالص وقولى مين هو الاخ عمرو تحديدا
حقولك على حاجه عارف اما تفضل تاكل مخلل ومش وفجاه تلاقى تفاح بتاكله مره اتنين بعدها تزهق ونفسك تنكرف منه اهو المسلسلات التركيه كدا لان قصتها سواق سنوات الضياع او نور بتدور حول محور واحد وهى حب ومشاكل وفى النهايه يتجوزوا او يتعالجوا والامور تتصلح
احنا بقى مسلسلاتنا على سبيل المثال بقيت
من اطلق الرصاص على هند علام
على ما تقرا العنوان تكون زهقت وسيبت المسلسل
ويجيبوا يسرا والهام شاهين يفصلولهم مسلسلات مقاسهم بس خساره تارزى سكه بتطلع محزقه شويه يا مبهوقه عليهم
ثم يطلع صيحه تامر وشويه فتلاقى بدل ايجاد قصص جديده وتطوير الموضوع يجيلك احسان ونيشان ولا معرف احسان وتعبان
حاكم احنا التقليد على ودنه
ثم تنتقل للمسللات التاريخيه جمال عبد الناصر اللى قتل بحثا وخلاص يعنى حفظنا الثوره صاميناها مش يجيب جديد لا برضوا نفس القصه مفيش فايده
ولا المسلسل الدينى دا عاوزله بوست لوحده حسن يوسف طالع صديق ابنه فى الفيلم استخسر باين القرشين اللى الواد التانى كان حياخدهم وقال يكمل هو الدور وطالع فى عمر شاب عنده 25 سنه والمصيبه بيقرا القران غلط ولا يا عينى على لما يدعو حد للاسلام ....من فضلك يا اختى غطى رجلك الاول عشان اكلمك ....واحده مش معترفه بربنا خالص وتقولها غطى رجلك ؟؟
وكله كوم وابوه اللى طالع من سنه دا كوم تانى خالص يعنى تخيل كدا انت وبابا انت 25 وبابا 50 مثلا وانت شكلك انت اللى ابوه مش هو اللى باباك
والعجيبه السملس كان هايل والممثل التانى بيمثله حبكت يغيروه طيب يغيروه لما يكبر ...مش انا ابقى 21 بشكل شاب وييجى ابقى 25 الاقينى حسن يوسف
خساره والله الدكتور عبدالحليم محمود يستحق احسن من اللى بيتعمل دا
اقولك كفايه عشان انا طولت فاصل ونواصل

سومه...مجنونه فى بلد عاقل يقول...

عدناااا
اما عن شيخ الازهر وشيوخ السعوديه الكرام فوالله تعبوا نفسهم جدااا
واجهدوا عقولهم
سابوا ظلم الحكام وفساد الحكومات واخلاق المسلمين اللى فى الحضيض ومعملاتنا الزباله
وبزخ السعوديين والناس الجياع فى كل مكان وفلسطين والحديد والغاز والكهرباء اللى بنديها لاسرائيل ناقص نديلهم قطع غيار بنى ادمين
وحزقهم قوى مسلسل نور انا اكاد اجزم بالقول انهم غيرانين من مهند :))
عشان عينه زرقه
كمان فى اضافه نونو عندنا فى مصر اجمل من مهند بكتير خد عندك عائله الحج فهمى ولاده مصطفى وحسين وعندك احمد عز مع انى مليش فيه بس شهاده لله الواد حلو ...وكله كوم ورشدى ابظه كوم تانى
واخيرا الحج ابو تريكه نجم نجوم الاهلى...
وبلاش مصر خلينا فى الاجنبى ما فى حلوين برضو فى الافلام الاجنبيه الاخ نيكلوس كيدج الاخ توم كروز الاخ جورج كلونى الاخ ترافولتا الاخ براد بيت واخيرا الاخ العقيد معمر القزافى
كول دول برقبه مهند
بس هو الفرق ان الناس تقريبا اول مره من زمان تشوف واحد راجل فى تعاملاته وانت عارف
يا مكتر ذكور العرب بس الرجاله الفعليين اللى فعلا بيتحملوا المسؤليه شاحين فى السوق والظاهر والله اعلم حنضطر نستورد كميه تكفى من تركيا وايران وفلسطين لسد حاجه السكان العرب
سلام انا قايمه اعمل السحور
يعنى حيبقى لا اكل ولا نوم

CAIROCOMPUTER يقول...

تحيه طيبه وكل عام وانت بخير
فكرة المدونه جيده ونحن سعداء بها وبك وسيكون لنا لقاءات ان شاء الله مع افكارك فى برنامجنا الأذاعى وهو اول برنامج اذاعى عن النت والمدونات فى الشرق الأوسط ويذاع يوميا عدا الجمعه صباحا من الأذاعه الرئيسيه لمصر
وكافة التفاصيل فى مدونتنا وموقعنا
والبرنامج متوقف طوال شهر رمضان
المدونه
http://netonradio.blogspot.com
الموقع
http://dear.to/cairo
والدعوه موجهه ايضا لزوار مدونتك

September 14, 2008 8:55 AM

تحيه طيبه وكل عام وانت بخير
فكرة المدونه جيده ونحن سعداء بها وبك وسيكون لنا لقاءات ان شاء الله مع افكارك فى برنامجنا الأذاعى وهو اول برنامج اذاعى عن النت والمدونات فى الشرق الأوسط ويذاع يوميا عدا الجمعه صباحا من الأذاعه الرئيسيه لمصر
وكافة التفاصيل فى مدونتنا وموقعنا
والبرنامج متوقف طوال شهر رمضان
المدونه
http://netonradio.blogspot.com
الموقع
http://dear.to/cairo
والدعوه موجهه ايضا لزوار مدونتك

September 14, 2008 8:55 AM

كوارث يقول...

ازيك يا محمد ؟
بخصوص نور ومهند
يوم ما كنت بتصور في التلفزيون المصري كنت واقف في الصحرا انا والجماعة اللي معايا في الصحرا- مدينة الانتاج- نتكلم طول الليل عن نور ومهند وتاثيرهم على عول الشباب
وانا كل شوية اقول دول بيسوقوا الافكار العلمانية عن طريق المسلسل حتى هما جايبين الاسرة مسلمة وبتاع
والله لقيت واحد داخل راكن بعربية متعرفش سمعنا ازاي
بيقول والله انا لسه عامل مشكلة مع مراتي بسببهم حالا وشكلها هتتطلق وضحك!
وراح سايبنا وداخل الاستوديوهات.. انا مكنتش بتكلم هوس .. لا نقد خاصة ان كنتي قاري يوميها خبر على موقع العربية ان بوستر مهند بقه ب25 جنيه !!
لحد يوميها كنت بتكلم عن نور ومهند وانا مشفتهمش على اي مفسد يوم اساسا وانما بناء على معلومات قرائية كلها
لما شفتهم بقه فوجئت بالتفاهة اللى موجودة قدامي عالشاشة وتابعتها لفترة ثم زهقت والله حاولت اجيب الجزيرة او العفاسي او حتى ميلودي نتفرج شوية لقيت السادة المشاهدين دماغهم والف سيف كلا والف كلا
الموضوع ازمة متفاقمة يا سيد غزالي
الله يرحم ام عبده
والله فعلا مصر فقدت ام عبده وام ميمي وام حسين
بالنسبة لشيخ الازهر
فمعلومة حلوة انه بيتفرج على مهند ونور !

نيران يقول...

السلام عليكم..

اقولك سر..

أنا من الأحراار يا علي.. أقصد انا من الناس اللي ما اتفرجوش على المسلسل

والله انا ما اعرف القصة
و ما كملت حلقة كاملة على بعض
مع ان عندي دش و تكنولوجيا يعني
و هذا يجعلني اشعر بفخر عجيب.. عجيب اوي

انا حرة.. انا ما اتأثرتش بالهبل دا.. انا كويسة يا ولاد

و هذا ان دل يدل على ان الحاجة ام عبده لازالت في الروح و في الوجدان

لا و ايه.. دا انا حتى ما اتفرجتش على مسلسلات في رمضان دا خالص..

انا حرة.. والله حرة
لا تلفيزيون يهم ولا حكومة تلم..

انا كمان ما باحبش تامر حسني،..
لا دا انا حتى ما بقيتش حافظة اسامي الممثلين

بس تعرف المشكلة ايه.. و دي المشكلة الي أدت إلى كل المشاكل و العبط المستشري في المجتمع..
هو ان الاب ما بقاش قادر يقول لا يا جماعة مافيش فايدة من انكم تتفرجوا على الكلام دا
ان الأم بقت اهبل من بنتها.. مع احترامي للأمهات اللي اتلقحوا و اتفرجوا على المسلسل.

ان موضوع اتفرجت على المسلسل غصب عني دا بقى كتير اوي..
ماحدش عاد قادر يقول لع.. لع لع..

يعني لاقادرين نقول للحكومة لع
ولا لمهند و اعوانه في التلافازيون لع
ولا لكم المسلسلات و الفلوس اللي بتنصرف عليها لع..
ولا لكم الإسفاف و الانهباط و الانحطاط في الفن عموما لع..

يا ترى..... لو ام عبده هنا..
كانت قدرت هي ولا عبده يقولوا لع؟

تحياتي

maha يقول...

سلام عليك يا غزالي
اولا كل سنة و انت طيب مع انها جاية متاخر اوي علي عيد ميلادك :)
و كل سنة وانت طيب بس مش متاخرةاوي يعني عشان رمضان :))))
...
مهند ؟؟؟؟؟
يادي مهند
ده انا تنفست الصعداء لما المسلسل خلص ...
الفكرة كلها مش روعة مهند "و اللي انا شايفاه شخصية بارده جداااا"
و لا هدوء نور .."برضه شئ من فتور الاحساس "
بس هو نفس اللي كان بيحصل ايام الجري و الجميلات
بالمناسبة اسمهم "ريدج و كارولين " و
ايام زينا و هرقليز
الفترة كلها ان الناس بتدور علي حاجة تلهييهم عن الهم اللي بيعيشوا فيه في وقت الجري و الجميلات كان احداث و عيلة عماله تعمل مكائد في بعضها
و في هرقليز و زينا كان ابطال بينتصروا للحق فكنا بننبهر ان "الحمد لله الخير بينتصر " و ده اللي بنفتقده حاليا في كل شئ في حياتنا
و اخيرا و ليس اخرا مهند و نور هو مجرد احتياج لرومانسية بقت دلوقتي بيتم التعبير عنها باغنية و كليب اغلب الوقت مش بيكون له علاقة بموضوع الاغنيةنفسها
...........

المقالة فعلا جميةاوي
بس تعرف اني معرفش مين اللي بيغنيلها عدوية ؟؟
:)
سلام
مها

عاشــــــ النقاب ـقــــة"نونو" يقول...

السلام عليكم
ابتلاني الله بضيفة في بيتي من شهرين وكانت مقتولة بالمسلسل دة وحاولت استتابتها كثيرا(وش بيتنطط من الضحك))
الا انها ابت وحاولت اتناقش معها في فايدة معاقبتنا احنا في اننا نتفرج على الهيافة دي
فقالت لي اصله مز زي ما المثقفة تبعك قالت وللاسف برضه الاخرى كانت كذلك
ولما قلت يمكن يا بت يا نونو فيه حاجة مفيدة وانتي ام جهل
لم اتحمل قرابة الربع ساعة وبعدها قررت ان المدعوة ما تدخلش بيتي تاني ولو دخلت مفيش فرجة الا عن اللي اشغله واذا كان عاجب:))))))

للاسف هو دة اللي فالحين فيه لما نقلد نقلد الفاسد ونقول التقدم في الفارغ
انما المفيد انسى
اما عن شيخ الازهر فحدث ولا حرج
ربنا يفكها علينا يارب
رمضان كريم وكل عام وانتم الى الرحمن اقرب
اعتذر عن تاخر الزيارة

None يقول...

استني بقي لما اركز من الاول

بالنسبه لمهند ..علي مستوي المسلسل انا الصراحه بتشل بسرعه ورغم ان الام بي سي تو وفور اكتر قناتين بتابعهم يعني لو لاقدر الله كان عندي وقت فراغ ..بس الصراحه انا اتشليت من المسلسل دا بدري بدري ..يعني كنت اغيب واسافر وارجع واروح واجي والاقيه لسه شغال ولسه متخاصمين ولسه بيحاول يصالحها .. حاجه تنقط يعني وانا ماليش طولة بال علي الشلل الصراحه ..دا غير اني مش شايفه مهند اللي فعلا فعلا يعني معظم اللي اعرفهم مهبولين علي جمال امه لا مز ولا نيله ..لاني مبحبش الجمال التلجي البارد لو كان في راجل

ثانيا مكنتش متابعه اوي الجرئ والجميلات ..بس كنت بتابع هركليز وزينا الصراحه عشان انا بحب الاساطير باختلاف انواعها وكنت بحب اي ار وفريندز طبعا طبعا وبي ووتش

ثالثا مبحبش تامر وتحديدا كلمات الاغاني بتاعته لاني حد مريضه نفسيا وهسهس وباخد كلام اغانيه بمعني سئ _الله اعلم بنيته طبعا _ بس الصراحه بردو عشان ابقي حياديه الالحان ساعات بتعلق معايا ..وحاجه ملهاش علاقه بأي حاجه بقي بس بجملة الرغي يعني ..مبحبش عمرو دياب ..او تحديدا مابحبش عمرو دياب رضي الله عنه زي ما الناس عملاه..وبفضل عليه منير

رابعا بلاش النظرة التشاؤميه دي ..ام عبده موجوده وبخير وبتسلم عليك .. مش الناس كلها بقت تسمع تامر ومش البنات كلها بقت شايفه مهند فتي احلامها اللي هايخطفها علي البي ام البيضا ويطير ..لسه الدنيا بخير يعني والبنات بعقلها ..بس من الواحد وعشرين يمكن وانت طالع ..ومش كله الصراحه عشان مابقاش ضحكت عليك ..

وكفايه رغي بقي لحد كدا

ولا تعليق علي موضوع شيخ الازهر عشان انا مقاطعه الناس دي

nona يقول...

باة ما تعرفش مهند دة حلقاتة عدت ال1000 حلقة ما كنش العشم كدة البنات هتقول اية علينا
يا رايت تعلقنا بالمسلسلات و الافلام و الممثلين يبقا ربع تعلقنا بمشاكلنا و هموم بلدنا و حالنا وسط العالم بس نقول اية
تعرف ان المسلسل ما حققش اى نسبة نجاح فى تركيا و لما اتعرض فى العالم العربى حدث و لا حرج و ساعاتها يبقا ما نلموش على الاى بيتقال علينا
استنا صحيح اوعى تقولى انك ما شفتش مسلسل سنوات الضياع كدة ازعل منك
انا من راى ما تجيش ناحية التلفزيون احسن بدل ما يجيلك امراض العصر
و كل سنة و انتى طيب

كيكى يقول...

اعاااااااااااااااااا
اعاااااااااااااااااااا
اعااااااااااااااااااا
قول انك بتضحك علية وانك مكنتش موجود
لا لا لا لا
حراااااااااااام
اعااااااااااااااااااااا
كان نفسى اشوفك
اعاااااااااااااا
تتعوض بقى مرة تانية ةعلشان احدك
هههههههههههههههههههههه
واوعى تتضايق نفسك على مسلسل نور
انا بعون الله اديهم خدة واحده بسسسسس
واخليهم يتوبة على مسلسل نور دة
اعااااااااااااااااااااا
و وو سبنى اعيط بقى
اعاااااااااااااااااااا
عوووووووووووووووووووووووو

كيكى يقول...

هابى برث دى
سورى جاية متاخرة..بس اعمل اية انت عارف الموصلات
هههههههههههههههههههه
وام عبدة عطلاتنى
عوووووووووووووووووووووو

MaGn0liA... يقول...

رائعه بجد

و خصوصا موضوع الفرانكو اراب

نفسى الناس تعتز بدينها و بلدها و لغتها

زى ما هم معتزين بيهم

و شيخ الازهر ميقدرش يتكلم فى حاجه عن الحكومه اصلا

ربنا يهدى

بجد بوست حلوه اوى

ذو النون المصري يقول...

زي ما انت قلت
اذا كان عبد الحليم العظيم انقلب للمسهوك تامر حسني
و الفول و الطعميه انقلبت لكنتاكي
و غيره و غيره
فطبيعي ان ام عبده تروح و مترجعش
انا مش عارف ليه الاهتمام الغريب بمسلسل نور و زينا و هرقل و غيرها من هذه النوعيه من المسلسلات؟
عبط
حب تجريب شيء مختلف
تغيير
مش عارف
...............
كل سنه وانت طيب

ذو النون المصري يقول...

امره غريب فعلا شيخ الازهر
امام اكبر ازاي بس؟
امال لو امام اصغر كان عمل ايه؟

غير معرف يقول...

اخى العزيز الغزالى
والله وحشتنى كتاباتك زى ما وحشتنى جو المدونات كله

انا واحدة من الناس اللى قفلت مدونتى اما حسيت انها مش بتضيف للناس اى شئ غير شوية هموم والناس مهياش ناقصة هموم

المهم

انا ليا تعقيب صغير على مسلسل نور
انا معاك فى كل اللى انت قولته لكن حاجة واحدة بس اسنفدتها من المسلسل دا

ان الست لازم تكون قوية بنفسها مش باللى جوزها بيجود عليها بيه

وانا من خلال المسلسل دا قررت انى اكون ست قوية مستقلة بعيدة عن تحكمات اى رجل
وبعد ان اصبح قوية بما يكفينى و يرضينى .. حينها يمكن البحث عن الرجل المناسب لكى استكمل معه ما بدأته انا من نجاح و تحقيق ذات فى حياتى و بالتالى استطيع ان اعينه هو الآخر على استكمال نجاحاته و تحقيق طموحاته

يمكن البعض يعتبر ان رأيى دا سطحى .. بس هكذا علمتى الدنيا هذا الدرس

فلا قوة لامرأة تستمد من رجل
ولكن يمكن للرجل ان يعين المرأة على تكملة مسيرتها الناجحة فى الحياة

يمكن اكون خرجت عن الموضوع شوية بس كان جوايا كلمتين واجعينى اوى .. فا قولتهم و ارتحت

جزاك الله عنا خيرا
تحياتى و احترامى

سمية لطفى
صاحبة مدونة "فى حاجة غلط" سابقا

ojg يقول...

البقاء لله في أم عبدو يا أستاذ غزالي
انت ماحضرتش العزاء؟؟
مع انهم قالوا انه هيتذاع في التليفزيون ع الهوا كمان
بس تقريبا صادف وقت عرضه عرض مسلسل الرائع الوسيم الفزيع المريع مهند والأخت الست الداكتورة نور
ربنا يعيذنا
واللي يغيظك ان مش بس ستات اللي بيتفرجوا
في رجاله بتحب المسلسل وبتشجعه
ياخووووفي يتعلموا منه
حسبي الله

wanna b a physician يقول...

والله ياغزالى انا ما شوفت المسلسل ده شوفت مرة صورة بالصدفة للاخ والاخت الحلوين بس
لكن سمعت عنه وعن الضجة طبعا اللى حصلت والفتاوى والكلام ده
اصل المشكلة من زمان اوى من اول ما بدء الانهيار فى المجتمع وضياع القيم والمبادىء وظهور الخلاعة وانها تصبح شىء عادى
وحسبنا الله ونعم الوكيل
وكل سنة وانت طيب

shasha يقول...

موضوع مسلسل نور مش عند فى مصر بس ده فى كل الدول العربية ولى صديقة سورية بتحكى لى ان المسلسل هناك مكسر الدنيا والناس بتبعه بشغف غريب فى الشعوب العربية كلها يمكن لاحتياجنا للرومانسية اللى فقدناها فى الدراما بتاعتنا اللى تحولت كلها لقتل وعالم رجال اعمال وبالنسبة لموضوع ام عبده لا ام عبده موجودة وبخير وفى كل حتة فى مصر تقدر تلاقيها اول زيارة لى لمدونتك بس بجد هايلة تحياتى

Beram ElMasry يقول...

ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف المسار

واصطنعتك لنفسي يقول...

أمثال هذا المسلسل وأشباهه بيسموها "ثقافة الاستهلاك".. فكر اجتذاب شيء يستهلك وقت الناس.. عقولهم.. طاقاتهم.. ويلهيهم عن الواقع.. وللأسف بتنجح جداً هذه الحيلة مع الشعوب العربية.. لكي نظل مغيبن للأبد.. وأوعي حد يصحي أوعي حد يفوق..شششش خلينا نايمين

ربنا يعافينا

إيمان

sa'7so'7te يقول...

ألا صحيح هى بجد ام عبده راحت فين
D:
بجد وحشنى بلوجك يا جزالى..على فكرة انا لما لقيت نفسى مبطيقش المسلسل ده شكيت فى انى بنوته بجد..قلت يمكن اخواتى الولاد خرطوا عليا
:)
يارب يكون الصيام ماعملش معاك عمايله
و يلا هانت فاضل كام يوم بس

سنووايت يقول...

أم عبده سافرت لحد أمريكا تعمل عملية تجميل واعادة تأهيل

بالنسبة لنور ومهند فهو مسلسل الحقيقة كان بيستفزني وخاصة ان اختي كانت متابعاه من اول حلقة
وهو وغيره من المسلسلات سر متابعه مجتمعنا ليهم انها بعيدة عن مشاكلنا بتخرج بيك لعالم اخر ودنيا تانية بعديا عن همومك ومشاكلك , انا تابعت بعض الحلقات من بعض مسلسلات رمضان وكلها اشتركت في شيء انها كانت بتصيبني بالاكتئاب والاحباط رغم انها بتتكلم عن واقعنا للاسف

وبالنسبة لكنتاكي وكوستا فدا لاننا تحولنا لمجتمع مستهلك وليس منتج فمن الطبيعي انهم يلقوا عندنا سوق لترويج منتاجاتهم , لكن تعالي علشان تقعد في اي مطعم مصري وليس من مطاعم امريكانا خدمة سيئة , وسلعة أسوأ ومكان أسوأ وأسوأ
المشكلة في عقدة ام عبده ولكن في مستوي منحدر بتتعرض بيه قيمنا ومنتاجتنا , ومفيش اي محاولة لتحسين دا.

لكن أم عبده لسة موجودة بدليل الموضوع اللي انت كتبته وغيرك عايز يكتبه ويمكن انت عبرت عن كلام كتير مننا عايزين يقولوه في محاولة لانقاذ ام عبده


اسفة علي الاطالة بس موضوعك اثار نقط مهمة جدا يا غزالي بجد باحييك عليك

همس يقول...

ازيك يا غزالى

اولا : بجد كان نفسى اتعرف عليك

بس ملحوقه ان شاء الله هنتقابل تانى


ثانيا:

بجد بجد انااسفه مقدرتش اكمل البوست قرايه

بجد مرارتى اتفقعت

من كام حاجه كدا

اولا علشان اصلا بتتكلم من المسلسل البارد دا

ثانيا جتلك مراره ياخويا تتفرج على حلقه ونصف

ثالثا:

صدفه سعيده اوى اننا انتفرجنا على نفس الجزء بتاع العمليه بس بصراحه مجتليش مراره اكمل زيك


رابعا :

كون على ثقه عمياء ان مش كل شعب مصر مهبول عليه بدليل انا

متقلش مش وش نعمه ياخويا

بس لما البت نورا صحبتى قرفتنى بيه واستغربت انى مش بتفرج عليه قلت اجرب

وبعد ما اتفرجت على الجزء دا

تعرف عملت ايه

سبت المكان بتاع التلفزيون وروحت المطبخ عارف ليه

علشان اتاكد ان التلاجه فى المطبج مش فى الصاله

اصلى حسيت انى بتفرج على الفريرز بتاع التلاجه مش بتفرج على مسلسل فى التلفزيون


والمصيبه انى قرات بعدها دراسه او استفتاء عن المسلسل

انه كان سبب فى طلاق كام حاله وتاخر فى مستوى الدراسه بتاع الطالبه
وافلام كدا دا كلو فى الوطن العربى

يعنى مش مصر بس الى فيها عالم هبله

لا كل الدول العربيه


والمصيبه يقلولى انا متغاظة ليه

يلا حصل خير

كل سنه وانت طيب

ورمضاااااااان كريم

جنّي يقول...

السلام عليكم

رمضان كريم ياغزالي

ام عبده موجودة بعد التطوير الى ام ابدو علشان تنسجم مع الفرانكو اراب

قالو زمان اللي مالوش ماضي مالوش حاضر

شهيدة يقول...

السلام عليكم

رمضان كريم :)

بالفعل يا استاذ محمد، بقى في تغير كبير في الثقافة والعادات. الحاجات القديمة واللي في الحقيقة اكثر نظافة وصدقا وبعدا عن الفساد. كل الحاجات دي بتختفي يوم بعد يوم

اما بالنسبة لنور ومهند فدي حكاية تانية خالص، يعني مش كافي كل الأشياء اللي يتلهي الأمة دي عن القضايا الكبرى كان ناقصنا نور ومهند عشان تحشى عقول الشعوب العربية بأكبر قدر من السخافة والتفاهة.

الله يجيرنا من شي مسلسل صاحب جنسية جديدة يسيطر على عقول جماهير الأمة العربية المجاهدة مرة تانية

تحياتي
وتقبل الله أعمالكم

وجه جديد د.أحمد عثمان يقول...

مش عارف والله حكاية المسلسل العجيب
لأني لم اشاهده
و لم اشاهد من يشاهده
انا حاسس انه زي اسطورة النداهة كده

بس اللي متأكد منه
ان سر نجاح الحاجات دي و الجريء و الجميلات
السر يكمن في الهواء

بعد دراسة متأنية
ترقى ان تتخاطفها المجلات العلمية
اكتشفت ان دماغ الناس دي
كلها هوا
لا شيء

Founoon يقول...

يا لطيف على مهند وتفاهة مهند وسطحية وغباء مهند شخص ارعن متهور غبي كثير البكاء دائم الصراخ اووووف

انا مش عارفه الذوق العام حصله ايه

بجد في انحدار عجيب في الذوق العام في شتى المجالات وعلى كل المستويات

حتى على المستوى الديني بما انك ذكرت الشيوخ الاجلاء اللي سايبين البلاوي اللي احنا فيها وبيتكلموا عن مهند !!!!!

كل سنة وانت بخير وام عبده فين هي راحت فين يارب نلاقيها بقى لأني حاسة بغربة

بنت مصريه يقول...

غزالى
فيه فطار للمدونين ف ساقيه الصاوى يوم الجمعه 26 وهيحضره خالد الصاوى كلنا رايحيين نتمنى نشوفك هناك
لوعايز تعرف التفاصيل زور مدونه عليا حلييم
http://aliahlim.blogspot.com/

نهر الحب يقول...

اجدت
صحيح كلامك هى محاولة للهروب من واقعنا المؤلم ومحاولة لتلافى الفوارق الاجتماعية بأتفه الاشياء
بس سؤال انت كنت متوقع فعلا ان شيخ الازهر يطلع على المنبر ويدعى على المتسببين فى كارثة الدويقة؟؟
ولا حتى يذكرها يبقى الله يرحمه ويحسن اليه مع الشهداء !!
شيوخنا الاجلاء فيهم اللى شاغل بريموت كنترول تبع هواء المتحكم
خليه يكلم عن مهند ولا شعبولا المهم
انه ميتكلميش فى المفيد ابداا
والا انت عارف الخرزانة موجودة
والعصا لمن عصى

تحياتى

shaimaa samir يقول...

احم
قالت لى احدهم ذات يوما

بصوت به فجيعه

اييييييييييييييييييييييييييييييييييييه مش بتشوفى المسلسل

فقلتلها والله انا بقالى ما يقرب من كذا سنة لا اشاهد اى نوع من المسلسلات
سوى لمحمد صبحى
اما الاجنبى فقد امتنعت عنه منذ امد

كانت وقتها هتقولى
يا جاهلة

قالتلى عامة المسلسل
محترم
هههههههههه
ومفيهوش حاجة
وخلص الموقف
واعتادت اذنى على ان تسمع عن ذاك المسلسل
وانا ازداد كرها فيه دون رؤية
ولم يثرنى فضولى الى الان ان اشاهده

سعيدة بتناولك هذا
وفى البوست الفائت ايضا

كلمه يقول...

ALLAH AKBAR :D

yeslam lesanak yabni :D

wALLAHi eldonya lsa be5eer ... wnta kol ely 2olto da sa7 100000 %
ana moktan3 beh gedan ... w ba2ayedak feh mn 2lby

ay 7d mesh byshkor fe tamer yeb2a 7ABEEB 2ALBI

PS: ana elwa7eed ely bykteb FRANCOARAB hena .. bs fe3lan ana ba5od wa2t taweel 2wy 3shan akteb 3araby... ana asly mesh 7afez amaken el7roof ..srry

rhf يقول...

المسلسل فعلا ممل احداثه متكررة ومبالغ فيها وغير واقعية ولكن أنا أول ما شاهدت منه أعجبني الجد وهو لامم عيلته حوله وقت العشا حول المائدة حابة جدا هذا المشهد أما باقي المسلسل فلا يستحق كل ذلك وطبعا المشاهد الخلابة لتركيا حلوة والقصر الذي تصور فيه راائع
ولكن ما يبثه في النفوس أسوء بكثير لأنه يبعث في النفوس التي تشاهده المقارنة بين البطل بالنسبة للفتيات والبطلة بالنسبة للفتيان
ولكن في النهاية الامر بأيدينا نحن من نشاهد و
كفاية هبل وانبهار بالوهم والانجراف في الخيال
تحياتي

dr.Roufy يقول...

ههههههههههههههه
انت قلت كل الى فارسني وكبوت جوايا والله
نوووووور ومهند..انا وللأسف الأسيف مش تابعت المسلسل الجبار دا
بس صادفت كدا اني شفت حلقة وللأسف تقريبا كانت نفس الحلقة..بتاع العناية المركزة وزرع الكلى وابني مات دي
الحقيقة الواحد اتأثر يومها,,حد الصويت
ماعلينا..بس والله كويس ان الحاج طنطاوي قدس الله سره..تصدى لهذه الموجة المارقة المنفلتة
ههههههههههههههه
ولاحول ولاقوة الا بالله

جنّي يقول...

السلام عليكم


تقبل الله منا ومنكم الصيام والقيام ايمانا واحتسابا لوجه الله الكريم

وعفا الله عنا وعنكم في ليلة القدر

بنت مصريه يقول...

هههههههههههههههه
والله انا مش عارفه مهند ده معقدكوا ف ايه
عالاقل هو مش مسلم الدور والباقى على تامر حسنى دا اللى البنات بتترمى ف احضانه ويغمن عليها
معأنى لما بشوفه بحس ان فيه وباء ف المكان وانى عايزه اهرش
ههههههههههههههههههه
انا شفت الحلقه اللى انت بتقول عليها دى
وانتوا ايه اللى مضايقكوا انه يسأل على مراته
مهو دا الطبيعى
لكن الراجل المصرى لو ف نفس الموقف اول ما هيفوق م البنج
هيقول جعااان عايز اكل
لكن مراته ف داهيه
ههههههههههههههههه
بس انا معاك ان الحكايه خدت اكبر من حجمها
ومعاك برضه ف موضوع الشيخ
صحيح عمال يتكلم عن واحد ملناش علاقه بيه ومش مسلم اساسا
طب مايشوف بالمره اللى واكلينها والعه

احييك عالبوست يا محمد
واتمنى تنورنى

بنت مصريه يقول...

اتمنى تنورنى يا محمد

بنت مصريه يقول...

اتمنى تنورنى يا محمد

Gannah يقول...

كل سنة وانت بالف خير
اعاده الله عليك وعلى أسرتك بالخير والبركات
عندنا العيد بكرة ان شاء الله
هديتى لك فى العيد كانت منذ يومين
دعوات لك فى العمرة
ربنا يوفقك
أم عبده وأم أحمد وكل الامهات بخير ولا ألف زى مهند يأثروا فيهم وانا شفت كام مشهد وبصراحة اما انى مش بشوف كويس ومحتاجة أغير النظارة أو البنات اتجننوا ...مهند ده عادى جدااااااا
ولا حول ولا قوة الا بالله
عيد سعيد
تحياتى

Beram ElMasry يقول...

سيدتى . سيدى
عيد فطر سعيد اعاده الله عليكم باليمن والخير والبركة ، وادام سعدكم وحقق احلامكم

dr.Roufy يقول...

كل سنة وانت طيب يافندم
:)

M.K يقول...

فعلا كلنا بنفتقد ام عبدو...


كل عام وانت بخير.....

نهر الحب يقول...

اللهم زد هـــــــذا الوجه نورا
واجعله دائـما مأجورا
وبلغه العيد مسرورا
امين يارب العالمين
عيد سعيد

جنّي يقول...

السلام عليكم ورحمة الله وبركاته

عيدكم مبارك

تقبل الله منا ومنكم
وكل عام وأنتم بخير
كل عام وأنتم من الفائزين
كل عام وقد حصدتم الجائزة
كل عام وأنتم ترفلون في ثوب الفرحة
كل عام وانتم مقبولون الصيام والقيام
كل عام وقد عفا الله عنكم في ليلة القدر

كل عام وأنتي منصورة يا أمتي

أخوكم
سعيد

عدى النهار يقول...

كل سنة وإنت طيب يا محمد وعيد سعيد على الجميع إنشاء الله

ojg يقول...

كل سنة وانت بألف خير
عيد سعيد
:)

موناليزا يقول...

ام عبده انسحبت من هذا الجو الملئ بالشعور بالنقص
****************
كل عام وانت بخير بمناسبة عيد الفطر المبارك اعاده الله علينا بالخير واليمن والبركات

carol 2002 يقول...

كل سنة وانت و عيد سعيد

امل يقول...

السلام عليكم ورحمة الله
ههههههههههه معاك حق والله طيب تعرف ان فيه عطر نزل اسمه مهند وعطر تاني اسمه لميس على اسم بطلة مسلسل تركي تاني بس مين أم عبده أنا معرفهاش بس أكيد كانت ست طيبه هههههه
كل سنة وانت بألف خير وعيد سعيد عليك يارب

rovy يقول...

اخى الفاضل

كل عام وانت بالف خير اولا و عيد سعيد ياارب عليك و على كل احبابك

مررت للتهنئه بالعيد و لو انى تأخرت قليلا فمعذره و لى عوده ان شاء الله

تحياتى

حزيــــــــــــــــــن يقول...

عجبنى اوى موضوع الشريرين اللى كانوا فى المسلسل دا

---
مش عارف اعلق على المسلسل لأن علاقتى بالمسلسلات العربى والاجنبى اتقطعت من حوالى 6 سنين تقريبا مبقاش عندى وقت
---
بخصوص ام عبده فبقت رجعيه وكافرة وارهابيه وجوزها راجل متوحش ورجعى ومتخلف وعرعرى ووهابى وابن كلب
فالناس هربت للكل بالشوكه والسكينه خوفا من ان يتقال عليهم انهم ارهابيين
زى حكوماتنا العربيه

تحياتى يا صديقى العزيز

ana ga3an يقول...

بيقولك افتي بعض الثقات
ان مهند ربما يكون المهدي المنتظر
واجزم البعض الاخر انة المسيح الموعود


وانا من مزنقي هذا اؤكد انة
اخو جمال وعلاء ولاد الجيران

Zianour يقول...

اضحكتني .. وانا لم يسعدني الحظ اطلاقا في مشاهدة العزيز مهند والاخت نور بس النت كله بيتكلم عليهم

المهم .. واضح ان الاثارة بدأت ف مصر لما الواحد فك منها

تامر حسني ... يااااااااه هي الناس دي لسه عايشة!!!
:)))

شهيدة يقول...

السلام عليكم استاذ محمد

اخبارك ايه؟

انا عندي خبر حلو على مدونتي لو تحب تقراه

تحياتي

وما تتأخرش علينا بقصصك الجميلة

عاليا حليم يقول...

انا معرفش مهندانا سمعت عن مسلسل نور و اسم مهند ده سمعته كتير لكن من قريب بس فهمت ان مهند هو بطل مسلسل نور
الى سمعته بيقول ان مسلسل نور ده تقليد للمسلسل الأمريكى الشهير ( الجرئ و الجميلات )

ع العموم كويس ادينا عرفنا ان مش مسلسلاتنا بس هى الى ركيكة و مهلهلة

gehan يقول...

مسلسل نور انا ما شفتوش لكن من كتر مالقيت فيه كلام عن مهند قلت اما نشوف هذا المهند، و يا ريتنى ما شفت بتاع ملزق و لا فيه ريحة الرجالة و حاجة كدة ياللا رزق الهبل ع المجانين ... تحياتى

Oma يقول...

a5rian la2it nas msh bey7bo mohand
ya 3am el mosalsal da asln kesto mn atfah ma yakon kesa 3adia gedan w mosalsal momel gedan w malosh ay ma3na w tamselhm da3ef gedan
ana makontsh bashofo lakn besra7a mn kotr el klam elly 3aleh 2olt ashof eh el mawdo3 ya gama3a la2it el mawdo3 wla 7aga bgd howa kest fada bas wla eeh msh fahma e7na weslna lely e7na fh da leeh !!
sa3at ba7es eno moda walahy ya m7md :D
ya3ni hoga keda w mshyt fe el bald zay el waba2 kolo..law ana msh abtfarg 3aleh hla2i sa7bty bttfarg a2om afta7 w ashof howa eh w 3shan ana fadia w sat7ia w dma3'i mafihash 3'er l fara3' so hatab3o..a3takd da sabb entsharo zay el waba2
bas el so2al elly baytra7 nafso howa hay5las emta b2aaa :D

Hope that every thing is ok with u

PrInCeSS BeRy يقول...

ازيك يا غزالى يارب تكوت تمام

اما عن السلبيات اللى اتكلمت عنها بشكل ساخر جميل بصراحة مهند دة انا مبطيقوش يمكن صحابى بيتخانقوا معايا انى مبحبوش بس انا فعلا شكلة معجبنيش ولا حبيت اتابع المسلسل شكلو بينرفزنى

اما عن تامر مش هقلك انا مبحبوش بصراحة انا صوتة واغانية بيعجبونى وفى وقت من الاوقات فعلا حسيتة ممكن يكون مثل كويس انو بيغنى دينى وانو زى ما قالوا نوعا ما بقة اتجاهة مختلف شوية بس طبعا احنا مبنشفش ومنقدرش نحكم

بس ناهيك عن تامر او الافلام فى حياتنا سلبيات كتير جدا هنقول من ضمنها الحجات دى لانها فعلا بتاثر فى حياتنا بس لو سبناها تاثر التاثير الحققيى هنضيع

تحياتى لاسلوبك الجميل

بنت مصريه يقول...

هيه ام عبده لسه تايهه يا محمد
هههههههههههههههه
اتمنى تنورنى

ســـــــهــــــــــر يقول...

وماذا عن غرام الغجر ..أنة يعلمك إن لسمار الجلد طلسم لا يفتح إلا بكلمة واحدة ...الجنون
************************
الجنون هو بوابة العشق الوحيده




الذكاء أساسا ليس حكرا على احد ولا هو عملية ذهنية صعبة ....انه ممارسة ووجود لإعمال تفكيرك في أكثر من موقع !!


سألقنك سؤال ولا تجيبي .. فكرى فيه فقط عندما تستطيعين القضاء على (الملك)الآخر بأحد الجنود هل هو ذكاء خارق منكأم غباء خارق من الطرف الآخر؟؟؟

***************************

او قد يكون مزيج من الشيئين


*************************


بهرنى ما قرأت

سأعاود زيارتى هنا ثانية ان سمحت لى
فالفكر هنا اكثر من رائع